húsaleigulög Frú forseti. Ég vil í upphafi þakka hæstv. ráðherra fyrir sína framsögu á þessu máli sem er athyglisvert fyrir margra hluta sakir. Hér er hoggið býsna nærri samningsfrelsinu í þessum tilgangi sem að er stefnt. Ég hef áhuga á því að ræða það við hæstv. ráðherra hvort hann hafi engar áhyggjur af því að frumvarp eins og þetta, aðgerðir eins og þessar, neyslu- og verðstýring, muni einfaldlega hamla framboði, minnka framboð, minnka hvata til að byggja og til að setja íbúðir í leigu. Reynslan erlendis frá sýnir akkúrat af hverju úrræði sem þetta virkar ekki. Vissulega þjónar það hagsmunum þeirra leigutaka sem eru nú þegar í kerfinu en fyrir alla hina sem eru ekki komnir í leiguhúsnæði — þeir líða í rauninni fyrir þetta.