húsaleigulög Frú forseti. Ég þakka hæstv. ráðherra fyrir svarið. Ég hygg að við séum ósammála um þetta. Ég ætla að færa mig í næsta mál. Það er í raun og veru áhrifamat á frumvarpinu sjálfu og það er viðurkennt hér í 6. kafla greinargerðarinnar að það sé gert ráð fyrir því að grunnfjárhæð leigu uppfærist í samræmi við framtíðarvæntingar. Hún er reiknuð í upphafi. Ég vil nefna þetta og setja í samhengi sérstaklega við Byggingafélag námsmanna, Félagsbústaði, Félagsstofnun stúdenta, aðila sem eru að leigja íbúðir til mjög skamms tíma til hóps sem fær úthlutað húsnæði á sérstökum forsendum, til að mynda á grundvelli þess að viðkomandi sé að stunda nám og þurfi að skila námsárangri til að halda íbúðinni. Hver verða áhrifin af þessu á annars vegar leigufélögin sjálf sem eru í þessari stöðu, eru ekki hagnaðardrifin, eru einfaldlega að reka sig á núllinu og svo hins vegar á stúdentana sem þurfa að greiða hærri leigu sökum þess að leigusalinn þarf að áætla verðbólguna til framtíðar?