húsaleigulög Virðulegur forseti. Ég þakka hv. þingmanni fyrir síðari spurningu. Nú þegar er óheimilt að hækka leigu fyrstu 12 mánuðina þegar gerðir eru nýir leigusamningar. Það virðist ekki hafa teljandi áhrif á þá sem stunda viðskipti á þessum markaði. Ég hef sjálfur komið að uppbyggingu og rekstri óhagnaðardrifins félags sem hefur starfað í þessu umhverfi við góðan orðstír og ég get fullvissað hv. þingmann um að þessar takmarkanir sem við erum að boða hér í þessu frumvarpi hefðu ekki neikvæð áhrif á rekstur þess félags eða teljandi áhrif á verðlagningu í þeim samningum sem gerðir eru í upphafi.