húsaleigulög Frú forseti. Ég þakka hæstv. ráðherra fyrir svarið og ég bara fagna því og tek undir mikilvægi þess að við séum að styrkja þetta af því að það hefur alveg sýnt sig að það veitir ekki af að hafa þennan hluta vel fúnkerandi eða virkan á markaði til þess að styðja við leigjendur. Það sem síðan skiptir auðvitað rosalega miklu máli í mínum huga þegar maður horfir á frumvarpið er þessi sjálfvirkni sem kemur inn í þetta. Við erum með þetta samfélag okkar sem er ofboðslega mikið vísitölutengt og nú erum við í raun og veru að stíga skref til að draga úr vægi verðtryggingar sem ég tel auðvitað gríðarlega mikilvægt skref að taka. Þessi hluti, sökum þess að hann hefur núna almennt verið að hækka mánaðarlega, hefur skilað sér með reglubundnum hætti. Getum við ekki átt von á því að með þessu verði betri dreifing einmitt á þeim hækkunum sem koma til og þá einu sinni á ári í stað þess að fá mánaðarlegar breytingar? Það gæti þar af leiðandi dregið úr verðbólgu sem skiptir gríðarlega miklu máli.