húsaleigulög Virðulegi forseti. Ég þakka hv. þingmanni fyrir síðari spurningu. Það er alveg rétt að þegar vísitölugrunninum var breytt þá hefur reiknaður húsnæðiskostnaður verið inni í vísitölunni. Þar liggur leigumarkaðurinn nánast undir en ekki verðmyndun eins og var og þess vegna er í sjálfu sér alveg fáránlegt að við skulum vera með kerfi eða í rauninni vísitölugrunn sem mælir húsaleigu sem er verðtryggð á þann hátt að hún breytist mánaðarlega og þær verðbætur sem koma ofan á leiguverðið fá svo aftur á sig verðbætur mánuðinn eftir. Þetta er auðvitað hluti af stærra verkefni sem ríkisstjórnin er að fara í, að minnka vægi verðtryggingar í íslensku samfélagi og þetta er auðvitað risastórt skref í þá átt.