húsaleigulög Virðulegur forseti. Hæstv. ráðherra svaraði í engu spurningu minni. Spurning mín lýtur að því af hverju ekki var haft víðtækt samráð í samráðsgátt áður en þetta frumvarp var lagt fram. Hæstv. ráðherra reifar hér að málið sé margkynnt og menn hafi allir haft hugmynd um hugmyndir ríkisstjórnarinnar um þessa leigubremsu sem er auðvitað eitt allsherjardellumál svona heilt yfir og á eftir að ræða hér. En í því ljósi, hvernig standast þá þessi ummæli í greinargerð frumvarpsins um að það hafi ekki mátt fara í samráð vegna þess að það gæti haft áhrif á hækkun leiguverðs gildandi samninga? Ég bara botna ekki neitt í þessu. Ég spyr hæstv. ráðherra: Af hverju fór málið ekki í hefðbundið samráðsferli eins og öll mál ríkisstjórnarinnar eru lögbundin til þess að gera og sérstaklega þegar við á um svona stórt mál? Af hverju fór það ekki í samráðsferli? Hver er ástæðan fyrir því? Í framhaldinu: Heldur hæstv. ráðherra að þetta mál fljúgi hér í gegn á einum degi? Að umræða um þetta mál hér á þingi kunni ekki að hafa þessi áhrif sem hæstv. ráðherra hefur svona miklar áhyggjur af og greint er frá í greinargerð með frumvarpinu? Hvaða hugmyndir hefur hæstv. ráðherra um þinglega meðferð málsins? Af hverju fór það ekki í samráð?