húsaleigulög Herra forseti. Ég þakka hæstv. ráðherra fyrir svarið. Aðeins nánar á þessum nótum þá hefur maður auðvitað skilning á því og ég tel æskilegt að sett sé ákveðin leigubremsa og að horft sé til þess að gera frekar langtímaleigusamninga á almennum markaði en svona út frá eðli kannski sérstaklega leigusamninga hjá námsmönnum, sem eru oft samningar til styttri tíma og tímabundnir samningar. Ef maður horfir til annarra Norðurlanda og annarra Evrópulanda þá hefur að mínu mati tekist best til við að vernda þennan hóp, þ.e. námsmenn, ef það eru samt sem áður gerðar ákveðnar undanþágur í lögum til að tryggja að þeirra sérstöðu sé haldið á lofti og lögin þjóni þessum hópi vel. En sem seinna andsvar: Telur hæstv. ráðherra samt sem áður æskilegt að hafa, þar sem það á við, ákveðnar undanþágur í lögum varðandi námsmannaíbúðir? Það er auðvitað skýr vilji löggjafans að það sé gert til að þjóna hagsmunum þessara leigjenda sérstaklega, sem eru þá námsmenn sem eru eðli málsins samkvæmt fyrst og fremst til styttri tíma á þessum tiltekna leigumarkaði. Ég má til með að nefna að þetta tengist öðru máli sem eru stofnframlög og vil koma því að líka að því ber að fagna að það hefur náðst árangur í því t.d. að vinna niður biðlista Félagsstofnunar stúdenta, svo dæmi séu nefnd, eftir námsmannaíbúðum. Þar skiptir auðvitað miklu máli líka vilji sveitarfélaga til að byggja upp óhagnaðardrifið húsnæði. Ég veit að ég og hæstv. ráðherra erum sama sinnis í þessu efni og ég vildi bara koma þessu að, en aðallega varðandi undanþágur námsmanna.