húsaleigulög Virðulegi forseti. Ég þakka hv. þingmanni fyrir síðari spurninguna. Mín skoðun er alveg skýr, að þegar kemur að rétti leigjenda sé ekki eðlilegt að veita sérstakar undanþágur sem skerða þann rétt. Það er mín staðfasta skoðun. Hins vegar treysti ég hv. velferðarnefnd til að fara vel yfir frumvarpið og vinna það í velferðarnefnd og ef hún sér annmarka eða möguleg tækifæri til að gera enn betur þá styð ég og treysti hv. velferðarnefnd í þeirri vinnu. Þau sem hafa fylgst með fréttum undanfarið vita t.d. stöðuna á Spáni þar sem verið er að boða til þingkosninga einmitt út af því að ekki hefur tekist að ná sátt um aðgerðir á leigumarkaði. Þetta frumvarp er viðbragð við mjög alvarlegri stöðu sem er komin upp á íslenskum húsnæðismarkaði og við höfum farið í fjölmargar breytingar, bæði á stofnframlagakerfinu og hlutdeildarlánum, jákvæðar breytingar sem hafa sannarlega skilað árangri og við erum hvergi nærri hætt.