Störf þingsins Frú forseti. Um þessar mundir liggja drög að frumvarpi um náttúru- og innviðagjald í samráðsgátt stjórnvalda. Þar ráðgera stjórnvöld að rukka tiltekna erlenda ferðamenn yfir 18 ára aldri um 4.500 kr. yfir háannatímann en minna á öðrum tímum. Með sérstöku eftirliti á viðkomandi ferðamannastöðum verður gengið úr skugga um að viðkomandi hafi greitt þennan nýja skatt. Umræða um gjaldtöku af erlendum ferðamönnum hefur lengi verið uppi og ýmsar hugmyndir verið viðraðar í gegnum árin en hér er þó ekki um neitt almennt gjald að ræða, frú forseti. Það sem mesta athygli vekur er að gjald er einungis lagt á einn landshluta, Suðurland, og ekki bara á einn landshluta, frú forseti, heldur eina sýslu, Árnessýslu, og ekki bara á eina sýslu, frú forseti, heldur ferðamannastað sem staðsettur er í einu sveitarfélagi, Bláskógabyggð. Eitt sveitarfélag, frú forseti, eitt sveitarfélag. Þannig verða erlendir ferðamenn rukkaðir um þetta innviðagjald ef þeir hyggjast heimsækja Gullfoss, Geysi og Þingvelli, okkar helstu náttúruperlur. Óhætt er að segja að þessi áform um nýja skattlagningu hafi vakið mikil og hörð viðbrögð. Ferðaþjónusta á svæðinu á sér langa sögu og allir innviðir hafa verið byggðir upp á löngum tíma og strax verður vart við að dregið hefur úr fjárfestingaráformum á þessu svæði. Undirtónninn með þessum frumvarpsdrögum er að þannig sé unnt að dreifa ferðamönnum betur um landið og það skal gert með því að skerða samkeppnishæfni þessa tiltekna svæðis þar sem finna má mestu náttúruperlur landsins, Gullfoss og Geysi, og þjóðargersemina Þingvelli með sína mögnuðu sögu, náttúru, jarðfræði og stofnstað elsta þjóðþings í heimi. Vitaskuld munu ferðaþjónustuaðilar hugsa sig tvisvar um þegar velja á áfangastaði og hættan er sú að farnar verði aðrar leiðir og fundnir aðrir staðir. Nei, frú forseti. Nú er kominn tími til að stöðva þetta skattabrjálæði ríkisstjórnarinnar sem í þessu tilfelli mun einungis koma hart niður á ferðamannastöðum á Suðurlandi.