Störf þingsins Virðulegur forseti. Ítrekað heyrum við sögur af foreldrum sem eru að reyna að fá aðstoð fyrir börnin sín í kerfinu svokallaða en lenda í langri bið eða einhvers konar úrræðaleysi. Ég þori að fullyrða að þingheimur og samfélagið allt sé sammála um að þegar börn þurfa á þjónustu að halda þá viljum við að hún sé til staðar, að biðin sé stutt og að hún virki vel. Fyrir fimm árum voru innleidd lög sem í daglegu tali ganga undir heitinu farsældarlögin. Markmið þeirra var að tryggja að börn og foreldrar hefðu aðgang að samþættri þjónustu við hæfi án hindrana, að þeim væri tryggður réttur á aðstoð á réttum tíma og frá réttum aðilum. Markmiðið var sannarlega gott en í byrjun sumars skilaði Ríkisendurskoðun stjórnsýsluúttekt um innleiðingu og framkvæmd laganna sem innihélt ábendingar sem við þurfum að taka alvarlega. Skýrslan dregur m.a. fram að undirbúningur laganna hafi verið ófullnægjandi og að ávinningsmatið hafi vakið óraunhæfar væntingar; að það hefði átt að byrja á að kortleggja stöðu barna, hvaða þjónusta væri til staðar, hvaða úrræði vantaði og síðan ákveða forgangsröðun. Það er nefnilega þannig að það er ekki hægt að samþætta þjónustu sem er ekki til staðar eða þjónustu sem þarf að bíða eftir mánuðum saman eða jafnvel árum saman. Stjórnskipunar- og eftirlitsnefnd á eftir að fjalla ítarlega um skýrsluna en, virðulegur forseti, mér þykir þessi kortlagning sem ríkisendurskoðandi kallar eftir ekki þola neina bið. Ég hef þess vegna lagt fram beiðni um skýrslu til forsætisráðherra um kortlagningu á velferðarumhverfi barna og fjölskyldna þeirra. Skýrslubeiðnin er mjög ítarleg og tekur til þjónustu og úrræða á sviði félagsmála, heilbrigðismála og barnaverndarmála. Hún á m.a. að greina hvaða þjónusta er til staðar, hver ber ábyrgð á henni, hvernig aðgengi að þjónustu er fyrir ólíka hópa á ólíkum svæðum, hvar götin liggja í kerfinu og síðast en ekki síst hvort árangursmæling sé að eiga sér stað. Ég hvet þingmenn til að kynna sér efnið og veita skýrslubeiðninni brautargengi þegar hún kemur til atkvæðagreiðslu, vonandi á næstu dögum.