Evrópska efnahagssvæðið Frú forseti. Ég þakka hæstv. ráðherra fyrir svarið. Ég verð að spyrja hæstv. ráðherra, sem er lögfræðimenntaður, hvort hæstv. ráðherra telji engan mun á svigrúmi norsku stjórnarskrárinnar og þeirrar íslensku hvað framsal varðar. Í öðru lagi langar mig að heyra afstöðu hæstv. ráðherra til þeirrar einföldu spurningar: Hví ekki að verjast fyrir EFTA-dómstólnum? Hæstv. ráðherra hefur nefnt hér ein tvö mál sem eru umdeilanlega til stuðnings þessari nálgun en það er fólk fyrir dómstólum dagana langa og ég man eftir orðum hæstv. ráðherra hér í þingsal þar sem hún vísaði til þess að menn yrðu að fá leyst úr ágreiningi og réttaróvissu sem myndi skapast vegna þessarar innleiðingar verði hún kláruð með þeim hætti sem ráðherra leggur til, fyrir dómi. En ég ítreka spurningarnar: Lítur ráðherra svo á að það sé ekki munur á svigrúmi norsku stjórnarskrárinnar og hinnar íslensku hvað framsal löggjafarvalds varðar? Hins vegar langar mig að heyra afstöðu ráðherra til spurningarinnar: Hvers vegna ekki að verjast fyrir EFTA-dómstólnum?