Evrópska efnahagssvæðið Virðulegur forseti. Ég verð að segja að mér blöskraði framsaga hæstv. utanríkisráðherra um þetta mál; hálfsannleikur og sums staðar hreinar blekkingar um málavexti bókunar 35 og EES-samningsins. Ég saknaði þess að heyra ekki hæstv. utanríkisráðherra fjalla um aðdraganda að EES-samningnum og einmitt þau skilyrði og þann sáttmála sem var gerður hér þegar EES-samningurinn var samþykktur hér með þeim skilyrðum til að hann stæðist stjórnarskrá. Mig langar að spyrja hæstv. utanríkisráðherra, af því að henni er tíðrætt um fæðingarorlofsdóminn sérstaklega og vitnar hér orðrétt í dómsniðurstöðu Hæstaréttar sem nákvæmlega felur ekki í sér að Hæstiréttur sé að senda þau skilaboð eða að segja það að bókun 35 hafi ekki verið innleidd réttilega. Það kemur ekkert fram í dómi Hæstaréttar um það. Það kemur ekkert fram um það að bókunin sé ekki innleidd réttilega heldur er leyst úr þeim réttarágreiningi sem lagt var fyrir í því máli. Ég spyr hæstv. utanríkisráðherra: Telur hún að fæðingarorlofsmálið hefði farið öðruvísi ef þetta frumvarp hefði verið orðið að lögum? Treystir hæstv. utanríkisráðherra sér til að fullyrða það?