Evrópska efnahagssvæðið Frú forseti. Þetta var svo sem ekki svarið sem ég var að leitast eftir. Enn og aftur finnst mér hæstv. ráðherra gera helst til of mikið úr efni þessa frumvarps og bókunarinnar. Ég var að freista þess að fá staðfestingu á því, sem er fullkomlega eðlilegt, að verkefnið væri auðvitað fyrst og fremst að innleiða EES-reglurnar sjálfar, efnisreglurnar, ekki þessa bókun, þ.e. hún er ekki aðalatriðið. Hún tekur eingöngu til þegar okkur hefur mistekist að samræma þetta tvennt, þegar það eru til tvær íslenskar innlendar lagareglur sem vegast á. En hæstv. utanríkisráðherra sagði hér að Alþingi hefði ekki tekist að klára þetta mál og í því sambandi vil ég vísa í ummæli stjórnarmanns ESA, Árna Páls Árnasonar, sem sagði í viðtali við Ríkisútvarpið 30. september að hann hefði látið vita á fundi með fulltrúum allra flokka að mál yrði höfðað ef frumvarpið yrði ekki afgreitt á vorþingi. Því vil ég spyrja hæstv. ráðherra út í þetta: Ef þetta lá fyrir, hvers vegna var málið þá ekki klárað núna í vor?