Evrópska efnahagssvæðið Virðulegur forseti. Aðeins varðandi fæðingarorlofsdóminn. Já, það er alveg rétt að lögum um Fæðingarorlofssjóð var breytt á síðasta ári. Ég þekki það ágætlega, enda var málið til umfjöllunar í hv. velferðarnefnd. Hæstv. ráðherra segir að lögin séu í dag í samræmi við EES-rétt. Já, en EES-rétturinn veitir hins vegar svigrúm. Hann veitir miklu meira svigrúm heldur en svo að hægt sé að slá því föstu að það sé bara einhver ein aðferð til að mæta þessum kröfum um samræmingu almannatryggingakerfa. Í dag eru lögin þannig að það er gert ráð fyrir að miða við tekjur á Íslandi eins og viðkomandi hefði verið að vinna á Íslandi í 12 mánuði. Ef læknir flytur til Íslands tveimur mánuðum fyrir fæðingu barns og vinnur hér bara í tvo mánuði, hvernig á að reikna út launin? Þá eru það núna íslensk lög sem kveða á um það eftir breytinguna að það sé reiknað út yfir 12 mánaða tímabil, gert ráð fyrir að það sé íslenskur launataxti sem gildi. En það kom einmitt skýrt fram í dómi Evrópudómstólsins í þessu máli að reglugerðin segir ekkert um þetta. Það er því ekkert því til fyrirstöðu að ríki Evrópusambandsins og inni á EES-svæðinu ákveði að miða launin við ríkið þar sem viðkomandi var að vinna, þannig að viðkomandi sem er að sækja um greiðslur úr Fæðingarorlofssjóði leggi fram launaseðla þar sem hann var að vinna og að við það sé miðað. Þetta horfir auðvitað öðruvísi við frá sjónarhóli okkar Íslendinga eða flestra annarra landa þar sem launin eru miklu lægri. Við getum auðvitað ekki setið undir því að menn komi hingað gagngert t.d. til að eiga börn til að fá reiknaðar hærri tekjur í fæðingarorlofi. Ég hef ekki tíma til að svara varðandi forsendur EES-samningsins en það liggur fyrir að það var samkomulag um það, þ.e. Alþingi samþykkti 3. gr. EES-samningsins. Þar með var málið útrætt. 3. greinin er innleiðing með sínum hætti á bókun 35 en því var hafnað að setja forgang á EES-réttinn. Forseti ítrekar tímamörkin.