Evrópska efnahagssvæðið Virðulegi forseti. Það er alveg skýrt sem kemur fram frá þáverandi nefndarmönnum: Ef þeir hefðu vitað að það væri ekki verið að innleiða þetta réttilega þá hefðu þeir bara farið aðrar leiðir til þess að framfylgja því sem bókunin inniheldur síðan í rauninni. Ég vil líka draga fram að þetta frumvarp sem hér er byggt á er m.a. byggt á því sem kom frá síðustu ríkisstjórn, ríkisstjórn Vinstri grænna, Framsóknar og Sjálfstæðisflokksins, sem byggt var m.a. á vinnu starfshóps sem hv. þingmaður sat sjálfur í. Mér þætti fróðlegt að vita hvað hefur breyst síðan það álit var sett inn. Aðeins líka út af söluturninum. Mér finnst eiginlega alveg með ólíkindum að hugsa hversu kaldrifjuð nálgunin er af hálfu hv. þingmanns. Staðan er sú að íslensk lög, í trássi við EES-samninginn, settu það á lítinn íslenskan söluturn að bæta það tjón sem brot stórs framleiðandaúti í heimi olli. Gott og vel. Það getur vel verið að við getum talað um einhverja gullhúðun. Hefði innleiðingin verið rétt þá hefði skuldinni verið skilað alfarið til rétts aðila, sem er að mínu mati framleiðandi þessa efnis sem olli þessu tjóni, þessum erfiða skaða á stúlkunni. Þannig að mér finnst, eðli máls samkvæmt, að fjársterkur framleiðandi, sem er mun burðugri til að standa undir þeirri skaðabótaábyrgð, hefði átt að gera það frekar en að lítil rekstrareining sem ber ekki ábyrgð á framleiðslunni stæði undir henni. Þarna erum við bara með mismunandi nálgun. Við getum alveg karpað fram og til baka og ég er að reyna að bera virðingu fyrir því sem hv. þingmaður er að segja í þessari nálgun. Það sem mér finnst standa eftir er: Vill Miðflokkurinn — af því að mér finnst hann tala tungum tveim: Hv. þingmaður segir eitt en ég heyri líka aðra þingmenn Miðflokksins ekki vera að tala skýrt um hvort við ætlum að standa undir okkar skuldbindingum sem fylgja því að vera með EES-samninginn. Mér finnst kominn tími til að Miðflokkurinn tali svolítið skýrt í þessu máli. Er hann tilbúinn til að standa með EES-samningnum, standa með litlum fyrirtækjum? Af því að mér finnst það skorta á og ég er hér í fyrirspurn til þingmanns.