Evrópska efnahagssvæðið Frú forseti. Ég þakka hv. þingmanni fyrir svarið en ég verð að viðurkenna að ég er engu nær. Hv. þingmaður veit jafn vel og sú sem hér stendur að það var ekki eitthvert fum hjá Hæstarétti fram til ársins 2013 að dæma í samræmi við meginreglur EES-réttarins eins og hann er og birtist í norskri réttarframkvæmd og dómaframkvæmd, dómaframkvæmd sem líður ekki fyrir óskýrleika sem er til staðar núna í íslenskum rétti sem fullskipaður Hæstiréttur hefur staðfest að sé til staðar. Það ríkir pólitískur vilji af hálfu, vonandi meiri hluta þessa þings, að færa þetta til betri vegar vegna þess að það er ábyrgð Íslands að gera það. Það er ekki ábyrgð erlendra dómstóla og erlendra lögspekinga að færa þetta til betri vegar í þágu fólks og fyrirtækja í landinu, fyrirtækja sem mér finnst hv. þingmaður tala af fullmikilli óvirðingu um, hvort sem það eru sjoppur eða bankar hér í landi. Hv. þingmaður veit vel að það er fólk sem bíður skaða af óbreyttu ástandi. Ég vil biðja hv. þingmann að útskýra fyrir mér, fyrst hún nefndi það sérstaklega í ræðu sinni, hvað það er sérstaklega sem henni þykir skemmtilegast í þessari umræðu, skemmtilegast við umræðuna um bókun 35 sem hér hefur skapast um þetta mál núna í fjórgang. Er það réttaróvissan? Er það sú staða að það sé skemmtilegt að beina því til fólks sem verður fyrir tjóni af óbreyttu ástandi að höfða mál við íslenska ríkið? Og ekki bara einu sinni heldur tvisvar, til að fá dæmdar bætur vegna mistaka við innleiðingu eða óskýrs réttarástands, ástands sem við svo sannarlega getum fært til betri vegar núna. Fyrst ég hef tíma langar mig líka til að spyrja, og ég veit að ég fer fram á að mikið: Hefur hv. þingmaður talið norska konungsríkið fullvalda ríki, líkt og hún minntist reyndar á í ræðu sinni? Er Noregur frjálst og fullvalda ríki? Ef svo er, hvernig má það vera í ljósi þess að stjórnskipunarlög þeirra leyfa þetta valdaframsal? Hvernig má þá vera að við missum fullveldi okkar og gefum af því afslátt ef við innleiðum einfalda og skýra forgangsreglu í þágu einsleitni hér á Íslandi þannig að við skerum okkur ekki úr á evrópska vísu? Forseti minnir á tímamörkin.