Evrópska efnahagssvæðið Virðulegi forseti. Mig langar að beina spurningum til hv. þm. Dagbjartar Hákonardóttur um þá stöðu sem er nú komin upp. ESA hefur vísað samningsbrotamálinu gegn Íslandi vegna innleiðingar bókunar 35 til EFTA-dómstólsins. Það er nú dómstólsins að skera úr um hvort Ísland hafi fullnægt skuldbindingum sínum. Og ég spyr því: Hvaða áþreifanlegu hagsmunir Íslands kalla á að Alþingi samþykki þessa lagabreytingu áður en niðurstaða EFTA-dómstólsins liggur fyrir? Hvað vinnum við á því að afgreiða málið núna? Og ekki síður, hverju hættum við með því að bíða eftir niðurstöðu dómstólsins? Í greinargerð frumvarpsins er lögð áhersla á að með því að leysa málið hér heima sé tryggt frumkvæði og forræði Íslands við lausn þess. En hvert er í raun það aukna forræði sem Ísland hefur áður en dómur fellur þegar sú lausn sem við veljum þarf hvort sem er að fullnægja skuldbindingum okkar gagnvart EES-samningnum?