Evrópska efnahagssvæðið Frú forseti. Ég þakka hv. þingmanni fyrir spurninguna. Hún er í sjálfu sér eðlileg. Ég vil byrja á að segja: Hagsmunirnir af því að leysa þetta núna eru náttúrlega ótvíræðir. Ég held að það dyljist engum að ef við kæmum því til leiðar að samþykkja þessa skriflegu forgangsreglu í tengslum við það hvernig við ætlum að reka EES-samninginn á Íslandi séu allar líkur á því að málið yrði fellt niður. Það væri gott fyrir Ísland. Það væri gott fyrir fólk og fyrirtæki í þessu landi og það væri gott fyrir okkur. Að leysa þetta núna, til hvers er unnið? Ég velti því bara upp hvort það sé eftirspurn eftir því að kíkja í þann pakka hér í þessum sal gagnvart EFTA-dómstólnum, til þess að sjá hvort það sé ekki bara hreinlega hægt að vinna málið. Ég lít svo á að ekki séu bara stjarnfræðilegar líkur á að vinna þetta mál heldur stend ég við þá skoðun mína að sumt sé bara ekki þess virði að fara út í. Ég veit bara ekki hvað yrði unnið með því að tala fyrir því að hér ríki einhvers konar önnur einsleitni eða bara hreinlega engin einsleitni á Evrópska efnahagssvæðinu, þ.e. á Íslandi.