Evrópska efnahagssvæðið Frú forseti. Ég þakka hv. þingmanni svarið. Næst hef ég áhuga á að spyrja hv. þingmann örlítið út í þessa málshöfðun ESA á hendur íslenska ríkinu sem auðvitað, og ég segi því miður, litar að einhverju leyti umræður hér í þinginu og þá sérstaklega í ljósi þessara ummæla stjórnarmanns eftirlitsstofnunarinnar, Árna Páls Árnasonar, sem segist einhvern veginn hafa í raun og veru varað við því á fundi með fulltrúum allra flokka að ESA færi í þetta mál yrði frumvarpið ekki afgreitt á vorþingi. Hæstv. utanríkisráðherra sagði í andsvörum við mig að ástæðan væri einhvern veginn fjölþætt og vísaði í því sambandi m.a. til þinglokasamninga sem voru gerðir eðli málsins samkvæmt undir lok þingsins síðastliðið vor eða sumar. Staðreyndin er hins vegar sú að utanríkismálanefnd afgreiddi málið úr nefnd með nefndaráliti 2. desember síðastliðinn. Það var nægur tími til stefnu. Ef hv. þingmaður getur gefið okkur einhvern lit á það yrði það vel þegið, af hverju það var ekki gert þá.