Evrópska efnahagssvæðið Virðulegi forseti. Ég þakka hv. þingmanni fyrir málefnalega ræðu þar sem hv. þingmaður fór víða. Mér hafa fundist orðaskipti hv. þingmanns við aðra þingmenn vera góð. Ég held að það sé augljóst að við þurfum að skoða það sem hv. þm. Sigurður Örn Hilmarsson var að vísa til vegna þess að hér tala stjórnarliðar um mikilvægi málsins og að þetta sé grundvallaratriði og hv. þingmaður hélt þannig ræðu. Það er þá óskiljanlegt af hverju þetta var ekki sett í forgang, ef málið er eins og lagt er upp með. En ég ætla ekki að spyrja að því. Ég ætlaði að spyrja hv. þingmann, sem mér fannst fara mjög vel yfir muninn á ESB og EES og beinu réttaráhrifin, af því að hv. þingmaður talaði líka um þjóðaratkvæðagreiðsluna: Hefði ekki farið betur á því ef forsvarsmenn já-hreyfingarinnar og ríkisstjórnin hefðu sagt frá þessu í atkvæðagreiðslunni, um forgangsáhrifin og ESB-réttinn? Ég spurði hæstv. ráðherra í hv. utanríkismálanefnd, ég held að hv. þingmaður hafi verið þar, og þá sagði hæstv. ráðherra að við gætum samið um ESB-réttinn. Heldurðu að það hefði ekki verið upplýstari umræða og betri ef já-aðilar hefðu bara sagt hlutina eins og þeir eru.