Evrópska efnahagssvæðið Herra forseti. Ég þakka hv. þm. Guðlaugi Þór Þórðarsyni fyrir spurninguna. Hún var bara ágæt. Ég vil hins vegar leiðrétta hann með það að það var bara ágætlega talað um muninn á beinum réttaráhrifum og forgangsreglunni í þessari umræðu í sumar þó að það hafi kannski ekki náð til eyrna allra. Undirrituð gerði það svo sannarlega í misskemmtilegum innslögum á samfélagsmiðlum og í tali sínu við kjósendur í símann. Það var kannski mögulega eitt af því sem var hvað erfiðast í þessari umræðu, að útskýra fyrir 19 ára Kvenskælingi muninn á beinum réttaráhrifum og forgangsreglu EES-réttarins. Það hefur svo kannski ráðið niðurstöðunni, enda var það svo að meiri hluti þjóðarinnar ákvað að halda sig við þá Evrópu sem það þekkti, EES-samninginn. En ég tel enga ástæðu til að fara út í það hvort umræðan hefði verið málefnalegri. Mér fannst hún að mörgu leyti, ekki öllu, bara ágætlega málefnaleg um þetta. Nú skulum við halda áfram og standa saman um EES-samninginn.