Evrópska efnahagssvæðið Virðulegur forseti. Það skiptir engu máli hvort við klárum þetta mál hér og nú með óbreyttum hætti eða tökum vinnu í utanríkismálanefnd til að ná einhverri breytingu eða farin verði dómstólaleiðin. Það verður alltaf okkar verkefni að klára málið eins og ég hef skilið það. Dómstóllinn mun ekki klára málið fyrir okkur, hann kemur bara með sína niðurstöðu og við þurfum að bregðast við því. Varðandi efnahagsmálin sem hæstv. ráðherra sagði að okkur greindi á um þá greinir okkur sannarlega á um þau. Við höfum einfaldlega sagt að það sé ekki eðlilegt að leggja mestu álögurnar á þá sem eru með lægri tekjur. Hlutfallslega sleppa breiðu bökin betur frá þessum fjárlögum ríkisstjórnarinnar heldur en þeir sem eru með lægri tekjur, ungt barnafólk á vinnumarkaði. Það eru þau sem munu þurfa að borga hlutfallslega mest, alveg klárlega upp fyrir sársaukamörk, svo notað sé orðfæri hæstv. fjármálaráðherra. Ég held að það sé alveg klárt að okkur greinir á um það. Við í Framsókn viljum bara leggja áherslu á að það er mikilvægt að fara að horfa til þess að greina niður á ákveðna hópa hvernig fjárlögin munu í raun og veru taka toll af þeirra möguleikum. Það er erfitt. Ég vil segja, hæstv. ráðherra, að við séum sannarlega á ögurstundu, ég er alveg tilbúinn að taka svo djúpt í árinni, ekki síst ef við horfum á stöðuna á vinnumarkaðnum. Varðandi afstöðu mína til nákvæmlega þess hvernig þetta á að framkvæmast núna þá finnst mér hafa orðin ákveðin breyting við það að sú hótun liggur yfir okkur að ESA sé búið að hóta dómsmáli. Við í utanríkismálanefnd, að aflokinni þessari umræðu, verðum að taka málið til skoðunar út frá öllum vinklum. Ef það er hægt að gera einhverjar skynsamlegar breytingar sem auka stuðning og skýrleika gagnvart fólkinu í samfélaginu og hugsanlega auka stuðning hérna í þinginu þá væri alla vega, held ég, þeirri vinnu vel varið.