Evrópska efnahagssvæðið Virðulegur forseti. Það er ágætt að rifja aðeins upp svona efnahagsstöðuna. Það er líka rétt að rifja það upp að þegar kom að kosningum var búið að lækka stýrivexti tvisvar og þeir lækkuðu held ég einu sinni enn eftir það. Eftir það fóru að renna tvær grímur á markaðinn og Seðlabankann og vaxtalækkunarferlið hætti. En það var á hraðri niðurferð hjá fyrri ríkisstjórn og svo er líka rétt að rifja það upp, af því að ég veit að það gleymist oft, að í lok árs 2024 var Ísland í efsta sæti að mati Sameinuðu þjóðanna á svokölluðum lífskjaralista. Ég sat í ríkisstjórn á þessum tíma sem hv. þingmaður vísar til, þegar þetta mál var lagt fram í fyrsta sinn, og ég studdi það að málið yrði klárað til þess að verja EES-samninginn. Mér finnst staðan að því leytinu hafa breyst, og mér finnst óþægilegt að hafa þessa hótun yfir í kjölfarið á þessari þjóðaratkvæðagreiðslu, að hún komi fram svona stuttu eftir og ríkisstjórnin bregðist þá aftur við með því að setja málið á dagskrá og kalla það mikilvægt eins og hún gerði þegar það var fyrsta mál á dagskrá þegar ríkisstjórnin var nýbyrjuð. Mér finnst það óþægilegt og þess vegna finnst mér mikilvægt að við í utanríkismálanefnd tökum málið til skoðunar á alla kanta.