Evrópska efnahagssvæðið Frú forseti. Þetta er áhugavert. Hv. þingmaður er ekki á móti samningnum. Það ber að minna á að bókunin sem hér er um að ræða var í upphaflega samningnum. Það eina sem er verið að gera hér er að festa þetta í sessi, gera tryggara í sessi. Það sem er í samningnum er þessi bókun og hv. þingmaður er ekki á móti samningnum en það sem er verið að gera er að tryggja þessa bókun frekar í sessi, þ.e. tryggja samninginn, sem hún er ekki á móti þannig að hann haldi. Það er það sem er hér undir. En að öðru. Mér fannst áhugavert þegar hún ræddi hér um makrílinn og hún taldi að það hefðu orðið einhver mistök hvað varðar makrílinn. Mér finnst það áhugavert því það hefur komið í ljós núna að stærðin á makrílstofninum var vanmetin árin 2010–2020, það er búið að viðurkenna að vanmatið hafi verið upp á 200–400%. Það er ekkert smáræði. Svo sjáum við aftur núna að í fyrra var talið að það þyrfti jafnvel að stöðva veiðar, það þyrfti að grípa í neyðarhemil, en nú í ár er búið að tvöfalda veiðina og menn eru búnir að endurmeta stofnstærðina. Það kemur líka fram að matið á makrílstofninum fer ekkert fram að stórum hluta í efnahagslögsögunni. Myndi hv. þingmaður skoða það með jákvæðum huga t.d. að gefa makrílveiðar frjálsar á þeim svæðum þar sem ekki fer fram stofnmæling, sem er sannarlega broguð? En ufsinn? — Það kemur seinna. [Hlátur í þingsal.] Vinsamlegast hafið hljóð í salnum.