Evrópska efnahagssvæðið Virðulegur forseti. Eins og Hæstiréttur bendir á þá var strax 2012 bent á að það þyrfti að laga þetta. Í 12 ár samfleytt undir ríkisstjórn Sjálfstæðisflokksins var ekkert að gert. Við erum ekki búin að vera í tvö ár og erum að reyna að koma þessu í gegnum þingið. Við skulum ekkert reyna að vera í einhverjum leikjum. Það var bara stjórnarandstaðan sem stoppaði málið í síðasta skipti. En það sem hefur gerst er að meginforsenda hv. þingmanns og formanns Sjálfstæðisflokksins til að klára málið er enn til staðar. Það liggur alveg ljóst fyrir frá ESA að ef Alþingi klárar málið þá verður málið dregið til baka. Ég spyr: Eigum við ekki að fylgja eftir því sem m.a. — af því að hv. þingmaður var að tala um þjóðaratkvæðagreiðsluna og hvað var sagt í aðdraganda hennar, að við ættum að klára málið sjálf. Gerum þetta bara sjálf. Nú hefur Hæstiréttur komið ítrekað með þessar ábendingar um að við eigum að klára málin sjálf. Ef það er eitthvað sem við eigum að vita, m.a. í umræðunni í tengslum við þjóðaratkvæðagreiðsluna en líka varðandi þróun heimsmála, þá er það að við þurfum að standa við okkar alþjóðaskuldbindingar. Við þurfum að vinna á upptökuhallanum gagnvart ESA. Það er alvörumál. Það er alvörumál að senda líka skilaboð út í heiminn til okkar viðskiptaaðila þangað sem við sendum inn um tæplega 70% af okkar útflutningsafurðum og það er ákall hjá íslensku atvinnulífi að við pössum upp á EES-samninginn. En síðan ætlar Sjálfstæðisflokkurinn að draga lappirnar. Ég veit ekki hvort ég á að hlæja eða gráta eftir að hafa horft á formann Sjálfstæðisflokksins. Það er eins og Sjálfstæðisflokkurinn sé að reyna að vera meiri Miðflokkur en Miðflokkurinn sjálfur, af því að allt sem hv. þingmaður sagði hér varðandi síðasta ár, eins og að réttaróvissa væri skaðleg fyrir íslenskt atvinnulíf og í raun andstæð markmiðum okkar um sterkt réttarumhverfi og að málshöfðun fyrir EFTA myndi ekki aðeins hafa í för með sér vantraust heldur einnig krefjast flóknari og víðtækari lagaumbóta, stendur eftir. Hvar er reisnin? Ég skora á Sjálfstæðisflokkinn að standa með ríkisstjórninni við að verja okkar mikilvægasta viðskiptasamning og okkar alþjóðaskuldbindingar.