Evrópska efnahagssvæðið Herra forseti. Það er leitt ef formaður Viðreisnar veit ekki hvort hann á að hlæja eða gráta. Það er leitt ef ég sem formaður Sjálfstæðisflokksins veld þessu mikla tilfinningaróti hjá hæstv. utanríkisráðherra. Hér kemur utanríkisráðherra eins og ráðherrum er tamt að gera í þessari ríkisstjórn, koma hér sífellt með útúrsnúninga og svara engu. Tala um að ekkert hafi verið gert og tala hér um að það hafi verið stjórnarandstaðan á síðasta ári sem stoppaði þetta mál. Nú veit formaður Sjálfstæðisflokksins ekki hvort hún eigi að hlæja eða gráta því að formaður Sjálfstæðisflokksins og Sjálfstæðisflokkurinn, Miðflokkurinn eða Framsókn er ekki með neitt dagskrárvald í þessu húsi. Það eru aftur á móti ríkisstjórnarflokkarnir með, ríkisstjórnarflokkarnir sem settu þetta mál á dagskrá vorið 2025 og tóku sjálfir meðvitaða ákvörðun um það að klára ekki málið heldur einhenda sér í skattahækkanir á atvinnulífið. Það var forgangsatriði ríkisstjórnarinnar á þeim tíma. Það var aftur mælt fyrir málinu í september á síðasta ári og nefndaráliti skilað 2. desember 2025. Af hverju kláraði ekki ríkisstjórnin þetta mál fyrir síðustu jól? Það hefði verið hægur vandi. Þið stýrið dagskránni í þessu húsi. Það gerir ekki formaður Sjálfstæðisflokksins. Það gerir ríkisstjórnin og ríkisstjórnin tók síðan ákvörðun um það að afgreiða ekki þetta mál heldur rjúka af stað í þjóðaratkvæðagreiðslu sem enginn bað um, og ákvað að eyða allri sinni orku á þessu ári í þá vegferð í stað þess að reyna að ná hér stjórn á efnahagsmálum.