Evrópska efnahagssvæðið Virðulegi forseti. Það er alveg rétt. Við erum að taka til og höldum því áfram og munum ekki gefa okkar eftir í þessu. Ég vil fá að spyrja hv. þingmann: Er hún sammála málinu? Mun hún greiða atkvæði með þessu máli? Það eru ekki útúrsnúningar af minni hálfu því ég er að vitna í hennar eigin orð. Þetta er bara flótti frá ábyrgð á eigin orðum og gjörðum. Hvað sem hver segir þá var Sjálfstæðisflokkurinn 12 ár samfleytt í ríkisstjórn en hafði ekki burði til að klára málið. Það er ágætt að heyra að formaður Sjálfstæðisflokksins viti hver er með dagskrárvaldið og þá er bara gott að vita að það er ekki á okkar ábyrgð ef málið nær ekki að klárast heldur er ég spennt að fylgjast með því hvort stjórnarandstaðan ætli að fara til að mynda í málþóf í þessu máli, ekki bara Miðflokkurinn heldur með fulltingi Sjálfstæðisflokksins, um að verja mikilvægasta viðskiptasamning sem Ísland hefur gert. Eins og ég segi, samkeppnin um að vera meiri Miðflokkur en Miðflokkurinn sjálfur er greinilega hjá Sjálfstæðisflokknum.