Evrópska efnahagssvæðið Herra forseti. Ég þakka hv. þm. Guðrúnu Hafsteinsdóttur fyrir prýðisgóða ræðu hér áðan. Ég verð að segja í upphafi, þó að ég sjái að hæstv. utanríkisráðherra hafi látið sig hverfa úr anddyrinu, að það var í raun og veru ótrúlegt að hlusta á hæstv. utanríkisráðherra í andsvörum við hv. þm. Guðrúnu Hafsteinsdóttur áðan og orðið sem kemur upp í hugann er gaslýsing. Mér fannst í raun og veru bara ótrúlegt að hlusta á ráðherrann og orðfærið. Varðandi yfirvofandi málaferli þá höfum við heyrt stjórnarþingmenn hér í þingsal í dag segja að það séu til dómsmál sem við höfum engan áhuga á að vinna. Mig langar að spyrja hv. þm. Guðrúnu Hafsteinsdóttur af því tilefni: Treystir hún hæstv. utanríkisráðherra til að velja öflugt málsvarnarteymi til að verja Ísland, íslenska hagsmuni og stjórnarskrá Íslands gagnvart ESA? Treystir hún hæstv. utanríkisráðherra til að fá öflugasta teymi sem til er til að verja Ísland fyrir EFTA-dómstólnum? Og önnur spurning: Telur þingmaðurinn ekki eðlilegast að fyrst ESA er búið að ákveða að höfða mál að þetta frumvarp verði lagt til hliðar og við förum bara í gegnum dómsmálið og fáum þá bara úr þessu öllu saman skorið? Því það eru álitamál og ég er þeirrar skoðunar að stjórnarskráin eigi alltaf að njóta vafans.