Evrópska efnahagssvæðið Herra forseti. Ég þakka hv. þingmanni fyrir svarið. Eins og ég nefndi í fyrra andsvari mínu þá fer þetta mál, að lokinni 1. umræðu, til utanríkismálanefndar og ég tel mjög brýnt að þar náist sátt og sameiginlegur skilningur í málinu. Það er auðvitað eitthvað stórkostlega undarlegt ef við ætlum ekki að fara gaumgæfilega yfir málið, eins og ég nefndi í fyrra andsvari mínu, þar sem forsendur hafa breyst. Það er búið að stefna Íslandi og málið er nú þegar farið til dómstólsins þannig að mér finnst það skipta máli. Ríkisstjórnin vissi líka fyrir löngu síðan hver afstaða ESA var og ríkisstjórnin vissi líka að málið gæti farið fyrir EFTA-dómstólinn. Reyndar sagði hæstv. utanríkisráðherra sjálf hér á Alþingi í febrúar á þessu ári að ef þingið afgreiddi ekki málið gæti það mjög líklega farið til EFTA-dómstólsins. Ég ítreka það að Sjálfstæðisflokkurinn styður EES-samninginn og ég bind vonir við að það náist sátt um þetta mál og það verði góð vinna í nefndinni.