Evrópska efnahagssvæðið Herra forseti. Ég þakka hv. þingmanni fyrir spurninguna. Hann spyr mig og ræðir um eins og það sé mjög mikið vandamál, málsóknir þar sem fólk þarf að leita réttar síns út af bókun 35. Þetta frumvarp leysir ekki þann vanda. Þetta frumvarp kemur ekkert í veg fyrir einhver hugsanleg málaferli í framtíðinni. Vandamálið er þá oftast vitlaus innleiðing sem þýðir að við þurfum að vanda okkur betur við innleiðingar og þurfum að horfa til þess að vinna betur hér á Alþingi. En ég vil líka nefna það að í minnisblaði utanríkisráðuneytisins segir að líklega myndi ekki reyna oft á ákvæðið í framkvæmd. Það myndi ekki reyna oft á ákvæðið í framkvæmd, segir utanríkisráðuneytið sjálft. Þetta eru orð ríkisstjórnarinnar og við erum því ekki að ræða hér neyðarástand, enda er hér um tiltölulega fátíð tilfelli að ræða, en það þýðir samt ekki að við sleppum við að leysa vandann heldur að við höfum tök á því að vanda okkur. Það er það sem ég hef sagt hér í dag og ég bind vonir við að það verði niðurstaðan í meðferð nefndarinnar þegar hún tekur þetta mál upp á sína arma núna á næstu vikum, að hún vandi sig virkilega því að vitaskuld skiptir þetta máli. Það skiptir máli að standa vörð um samninginn og það ætlum við Sjálfstæðismenn að gera.