Evrópska efnahagssvæðið Herra forseti. Við munum alltaf þurfa að leysa þetta mál. Það er nú bara þannig. Afstaða mín og Sjálfstæðisflokksins til EES-samningsins hefur ekkert breyst. Samningurinn hefur reynst Íslandi vel og við eigum að standa við okkar skuldbindingar sem við höfum tekið á okkur samkvæmt honum. En ég vil árétta það sem ég sagði hér í ræðu minni áðan að það að gangast undir alþjóðlegt samstarf útilokar aldrei lögfræðilegan ágreining um inntak samninga og EFTA-dómstóllinn er bara hluti af þessari stofnanaskipan. Það er ekkert óeðlilegt þó að málum sem ágreiningur er um sé skotið til hans til þess að fá úrlausn í ágreiningi. Það að bera ágreining undir dómstólinn er ekkert að grafa undan samningnum. Það er hluti af honum. Þetta er hluti af þeirri samvinnu sem við erum í og við eigum að standa við okkar skyldur og það munum við gera. Og aftur árétta ég að við Sjálfstæðismenn stöndum fast á því að það er Alþingi Íslendinga sem á að eiga síðasta orðið um þau lög sem gilda á Íslandi.