Evrópska efnahagssvæðið Virðulegi forseti. Ég verð að viðurkenna að maður getur ekki leynt því hvað maður hefur gaman af því að nota setningar sem voru notaðar bara nýlega í sumar í annars konar samhengi akkúrat í þessu máli. En varðandi tímasetninguna þá velti ég því upp, af því að þessi ríkisstjórn er þekkt fyrir svona brellur og hefur auðvitað verið að glíma við hvert hneykslismálið á fætur öðru og er þekkt fyrir að henda inn svona reyksprengjum til að afvegaleiða umræðuna, að þetta hefur ekki verið meira forgangsmál en svo að það hefur ekki verið klárað, ekki raunverulega sett á dagskrá eða í forgang hér í þinginu síðastliðin tvö ár og við vitum að það sem ríkisstjórnin vill koma í gegn kemur hún í gegn með góðu eða illu. Og varðandi tóninn, hvort ég telji að þetta mál tengist því að ríkisstjórnin hafi hreinlega ekki jafnað sig á tapinu í tengslum við þjóðaratkvæðagreiðsluna, þá endurtek ég bara það sem ég sagði í ræðu minni. Mér þótti miður að korteri eftir niðurstöðu þeirrar atkvæðagreiðslu, þegar ljóst var að ríkisstjórnin hefði tapað í þessari vegferð sinni, hafi þessi tónn verið sleginn og þetta mál hafi verið dregið upp í því samhengi. Mér þótti það mjög miður og ég veit að fleiri upplifðu þau skilaboð þannig. Varðandi ummæli hæstv. ráðherra sem ég fór yfir í ræðu minni þá eru þau bara ein af fjölmörgum sem eldast alveg gríðarlega illa. Það var ekki bara hæstv. atvinnuvegaráðherra sem talaði svona grimmilega niður EES-samninginn og þarf einhvern veginn að súpa seyðið af því að þetta er og verður áfram okkar mikilvægasti viðskiptasamningur. Um dómstólaleiðina endurtek ég bara það sem ég sagði í ræðu minni, mér finnst það gríðarlega mikilvægt að við leggjumst vel og vandlega yfir það í utanríkismálanefnd því að þetta er alveg ný og breytt staða og við hljótum að þurfa að leggjast yfir hana.