Evrópska efnahagssvæðið Herra forseti. Ég þakka hv. þingmanni svarið. Mig langar áfram að ræða tímasetningu þessa frumvarps, að það sé komið inn á Alþingi núna. Mig langar að velta því upp að það er svo ótrúleg staða að hæstv. ráðherrar og ríkisstjórnin velji að eyða tíma þingsins í þetta mál þegar allt logar stafnanna á milli hérna úti í efnahagsmálum. En hver er staðan? Það virðist vera þannig að þau séu svo ráðalaus að ef þetta mál væri ekki hérna, sem þau vita að mun taka mikinn tíma og mikla umræðu — ég óttast að þau séu ekki með nein góð mál tilbúin. Þau eru hreinlega að eyða tíma þingsins vegna þess að önnur mál eru ekki tilbúin. Ég get samt bent á það að þingmannamál, alla vega hjá minni hlutanum, sem bíða eftir að komast á dagskrá skipta tugum. Þar er fullt af góðum málum sem myndu hjálpa til við að taka á efnahagsmálum landsins. Þeim er ekki hleypt á dagskrá. Ríkisstjórnin hefur engin mál til að setja á dagskrá og ákveður þess vegna að koma með þetta mál enn eina ferðina, að því er virðist í einhverjum tapsærindum eftir sumarið. Seinni spurningin mín er hreinlega: Er þetta ekki bara komið hingað inn af því að ríkisstjórnin er algerlega ráðalaus þegar hún þarf sjálf að taka á málum?