Evrópska efnahagssvæðið Virðulegi forseti. Ég þakka hv. þingmanni fyrir andsvarið og tek undir það að þessi tímasetning er furðuleg með tilliti til margs. Ég fór ágætlega yfir það í ræðu minni hér áðan og get tekið undir athugasemdir hv. þingmanns. Þessi ríkisstjórn er þekkt fyrir að vera markaðsbrellustjórn. En mig langar að ítreka það sem ég sagði áðan í ræðu minni og biðla til almennings að láta ekki blekkjast, hafa áfram augun á boltanum. Við verðum að einbeita okkur að efnahagsmálunum og við verðum að gera kröfu til ríkisstjórnarinnar og þessa stjórnarmeirihluta um að setja þau mál á oddinn. Varðandi það sem við höfum auðvitað séð og blasir við á dagskrá þingsins þá tek ég sömuleiðis undir að það eru fá, ef nokkur, mál greinilega tilbúin af hálfu stjórnarmeirihlutans. Þá er auðvitað gráupplagt að draga fram einhver af fjölmörgum góðum þingmálum frá stjórnarandstöðunni og setja á dagskrá. Við vitum að það er sama hvaðan gott kemur. Ég hef nú hrósað ríkisstjórninni ítrekað fyrir að vera innblásin af mínum verkum þannig að ég vonast til að við fáum að sjá nokkur góð þingmannamál á dagskrá. Þetta er auðvitað 1. umræða þessa máls og gengur bara samkvæmt þingsköpum og hún verður ekkert lengri en hún þarf að vera. Þegar málið gengur til hv. utanríkismálanefndar ættum við að hafa góðan og rúman tíma í þinginu til að einbeita okkur að málum sem sannarlega eru forgangsmál í íslensku samfélagi.