Evrópska efnahagssvæðið Virðulegi forseti. Ég þakka hv. þingmanni fyrir andsvarið. Hv. þingmaður talar um að við eigum að virða ákvörðun meiri hluta þjóðarinnar. Þá spyr ég út í afturköllunina því að ég tel að ekki sé farið að vilja meiri hluta þjóðarinnar með því að þessi punktur sé ekki settur sem vantar fyrir aftan þennan leiðangur. Og varðandi það að ekki hafi verið spurt sérstaklega út í afturköllunina — nei, þetta var líka bara glæný yfirlýsing og afstaða sem kom hér fram nokkrum vikum fyrir þjóðaratkvæðagreiðsluna; dúkkaði upp frá fyrirsvarsmanni innan Evrópusambandsins, hefur enga stoð, hvorki í opinberum gögnum né, eins og ég benti á í ræðu minni, í alþjóðasamstarfi sem við tökum þátt í og þannig mætti lengi telja. Það þarf því að ganga frá þessum málum með sómasamlegum hætti og reyndar hafa einhverjir hv. stjórnarþingmenn tekið undir þá skoðun mína. Einhverjir stjórnarþingmenn hafa hins vegar haldið því fram, og gott ef ekki líka hæstv. utanríkisráðherra, að túlka beri niðurstöður þjóðaratkvæðagreiðslunnar sem svo að við ættum að drífa í þessu máli, bókun 35. Það var heldur ekki spurt um það. Það er því bara tínt til það sem hentar hverju sinni og maður er orðinn alvanur því með þennan stjórnarmeirihluta. Ég skildi ekki alveg spurningu hv. þingmanns varðandi hagsmunagæsluna og bið hana kannski um að skýra hana betur í síðara andsvari. Varðandi það hvort staðan sé gerbreytt — já, staðan er gerbreytt. Og hv. þingmaður spyr hvort þetta hafi ekki verið fyrirséð. Ég spyr. Ég var nú aðstoðarmaður hv. þm. Guðlaugs Þórs Þórðarsonar þegar hann var utanríkisráðherra og tók til varna í þessu máli í utanríkisráðuneytinu. Ég myndi ekki segja að neitt hafi verið fyrirséð í þeim efnum. Það er alvanalegt að bréf berist frá Eftirlitsstofnun EFTA til stjórnvalda og þeim sé svarað og það er allur gangur á því hvernig þeim málum lyktar. Staðan er sú að mál hefur verið höfðað og auðvitað er málið og staðan þá gjörbreytt. Varðandi það orðalag sem ég hef heyrt hér ítrekað í dag, um að við eigum að leysa málin sjálf, þá er verið að afvegaleiða fólk. Ég vek athygli á þessu. Ísland mun alltaf þurfa að leysa úr þessum málum sjálft, alveg sama hvort við gerum það núna eða í kjölfar dóms EFTA-dómstólsins.