Evrópska efnahagssvæðið Virðulegi forseti. Ég þakka hv. þingmanni fyrir svarið. Við verðum að leysa þetta mál sjálf og eigum að gera það. Það er meiri bragur á því að gera það hér í þessum þingsal en að vera gerð afturreka frá Lúxemborg, frá EFTA-dómstólnum sem ég ber fullt traust til í alla staði. Þetta mál er einstakt. Það snýst ekki um einstaka réttarhagsmuni í tilteknu máli. Þetta snýst um það hvort það gildi hér einsleitni og það gildi einhver fyrirsjáanleiki um fjórfrelsið á Íslandi. Ég held að það sé bara óboðleg staða, óboðleg staða og óverjandi að halda því fram að það sé í boði fyrir okkur sem öflugan og ábyrgan þátttakanda á Evrópska efnahagssvæðinu að hafa hér annað réttarumhverfi hvað varðar 3. gr. EES-samningsins en t.d. gildir í Noregi. Ég hef ekki heyrt rök þess efnis að það sé hægt að una við óbreytt ástand og ég faktískt veit ekki, forseti, hvað þarf að leggjast svona gaumgæfilega og vel yfir í utanríkismálanefnd. Við höfum unnið vel og ítarlega í þessu máli alla vega í þau tvö eða þrjú skipti sem við höfum tekið þetta mál fyrir á þessu kjörtímabili. Ég efa ekki heldur að Sjálfstæðisflokkurinn hafi lagst ansi vel yfir málið þegar málið var lagt fram í tíð fyrri ríkisstjórnar árið 2023. Þetta mál er runnið undan rifjum þeirra. Mér finnst bara ótrúlegt að ætla að blanda þessu tvennu saman, stöðu umsóknar, sem ég ætla ekki að gera lítið úr að skipti kannski einhverju máli, og þessu máli. En þetta snýst um EES-samninginn og getur komið í veg fyrir öfluga hagsmunagæslu af okkar hálfu. Þetta hangir yfir okkur eins og mara og hv. þingmaður veit það. Hún veit að við þurfum að nýta allar okkar innkomur, formlegar sem óformlegar, við hagsmunagæslu Íslands. Þar gildir að segja: Já, við stöndum við skyldur okkar en njótum ekki bara réttindanna. Og fyrst við erum að tala um frasa sem voru látnir falla hér í sumar, og þeir voru misgóðir á báða vegu, þá tek ég mér orð hv. þingmanns í munn og geri þau að mínum: Eigum við ekki að fá frið fyrir því að karpa um Evrópusambandið? Það er enginn hér að tala um Evrópusambandið nema Sjálfstæðisflokkurinn og Miðflokkurinn og hugsanlega Framsóknarflokkurinn. Ég vil tala um Evrópska efnahagssvæðið. Ég vil tala um EES-samninginn. Eina leiðin er áfram. Við eigum að standa vörð um okkar hagsmunagæslu og það gerir enginn nema Ísland sjálft.