Evrópska efnahagssvæðið Virðulegi forseti. Ég þakka hv. þingmanni fyrir andsvarið. Blessunarlega lúta ESB-sinnar hér höfði og tala ekki lengur hátt um Evrópusambandið af því að það er búið að þagga niður í þeim, a.m.k. tímabundið. En talandi um að mál hangi yfir okkur eins og mara. Þetta er einmitt notað þegar það hentar. Einhver myndi segja að það hangi yfir okkur eins og mara að hér hafi stigið fram fyrirsvarsmaður frá Evrópusambandinu og lýst því yfir algjörlega óvænt að við værum umsóknarríki um aðild að Evrópusambandinu, sem á sér enga stoð í neinum gögnum, ekki neinu verklagi og ekki í neinni framkvæmd. Ég er þeirrar skoðunar að ég sé ekki að blanda neinu saman heldur sé ég einfaldlega að benda á hvað ætti að vera forgangsmál hjá þingheimi hverju sinni. Númer eitt, tvö og þrjú eru það efnahagsmálin. Ef við ætlum að setja eitthvert utanríkismál sérstaklega á dagskrá hér þá ætti það að vera það að setja punkt aftan við þá sneypuför meiri hlutans að reyna að draga Ísland inn í Evrópusambandið. Meiri bragur á því að gera þetta sjálf — vá, þetta er eins og talað út úr mínum munni hér fyrr í sumar. Enda erum við sammála. Almennt er ég bara mjög sammála því að það sé meiri bragur á því að við gerum hlutina sjálf. Ég keyrði heila kosningabaráttu á því í sumar og við unnum. En ég er þeirrar skoðunar að við þurfum sannarlega að skoða þessa nýju og breyttu stöðu í utanríkismálanefnd af því að hún er það, þetta er mjög breytt staða. Þegar hv. þingmaður spyr hvort við höfum ekki grandskoðað þetta mál í utanríkisráðuneytinu, undir forystu hv. þm. Guðlaugs Þórs Þórðarsonar, þá er svarið: Jú, við lögðumst yfir þetta mál, við grandskoðuðum það og við tókum til varna.