Evrópska efnahagssvæðið Virðulegi forseti. Ég þakka hv. þingmanni fyrir ágætisræðu. Ég er aðeins að reyna að átta mig samt á málflutningi hv. þingmanns og stjórnarliða. Nú er það þannig, eins og fram hefur komið, að hv. þingmenn tala svolítið um að ESA muni fara í aðgerðir. Þessi ríkisstjórn vissi alveg af því fyrir löngu. Hún gerði ekkert í því og þessi ríkisstjórn, sem allt í einu er ofsalega mikil EES-stjórn, vildi að Ísland færi út úr EES. Hættu nú alveg. Virðulegi forseti. Þessi ríkisstjórn barðist fyrir því með oddi og egg, af öllum krafti, að koma Íslandi út úr EES. ESB er EES. Virðulegur forseti. Það er áhugavert að heyra gólið í háttvirtum stjórnarliðum en þetta gól meikar engan sens, svo að maður tali nú bara góða íslensku, með leyfi forseta. Þessi ríkisstjórn eyddi hundruðum milljóna ef ekki milljörðum og gerði allt hvað hún gat til að koma Íslandi út úr EES. Þessi ríkisstjórn vissi af því að ef hún myndi ekki klára málið, ef marka má yfirlýsingar þeirra sem eru í ESA, fyrir ákveðinn tímapunkt þá myndi þessi staða koma upp sem ríkisstjórnin hefur áhyggjur af núna. Af hverju eru þessi sinnaskipti? Hvenær varð Samfylkingin EES-flokkur? Því að Samfylkingin var ekki alveg stofnuð utan um ESB, en mjög fljótlega eftir að hún var stofnuð vildi hún ganga í ESB og þar af leiðandi út úr EES. Hún sagði fyrir kosningar: Heyrðu, ekki hafa áhyggjur af því, við setjum ESB-málin ekki á dagskrá, en um leið og hún komst í færi gerði hún það til að koma okkur út úr EES og fara í ESB. Sömuleiðis vissi hún af því að þessi staða kæmi upp ef hún myndi ekki klára málið 2026, þ.e. þetta mál sem hér er. Af hverju eru þessi sinnaskipti?