Evrópska efnahagssvæðið Herra forseti. Ég vil byrja á að þakka hv. þm. Kristjáni Þórði Snæbjarnarsyni kærlega fyrir að koma í þessa umræðu og taka umræðuna við okkur því að það skiptir miklu máli. Hv. þingmaður benti á að við þyrftum að vera með rétta innleiðingu, ég er sammála, og að tryggja réttindi fólksins. Hins vegar langaði mig að spyrja í tengslum við það að tryggja réttindi fólksins. Hefur hv. þingmaður engar áhyggjur af því hvað verður um réttindin sem fylgja lögunum sem stangast á? Mögulega þá lög sem samin eru hér af okkur á Alþingi sem við erum ekki að innleiða. Hvað með þau réttindi? Á fólk ekki að geta treyst þeim lögum? Það er það sem þetta snýst um. Þetta snýst bara um það þegar tvenn lög skarast. Hvernig er hægt að segja að það sé bara verið að tryggja réttindin á annarri hlið peningsins? Það er í raun og veru þannig að lög sem við myndum setja hér á Alþingi Íslendinga á morgun gætu verið orðin úrelt hinn daginn út af því að við höfum innleitt einhverja EES-reglu áður. Við erum ekki viljandi að láta þetta stangast á en það gerist í einstaka tilfellum. Þannig að ef þetta snýst um réttindi fólks þá spyr ég aftur: Hefur hv. þingmaður ekki áhyggjur af réttindum sem fylgja þeim íslensku lögum sem verða undir?