Evrópska efnahagssvæðið Virðulegur forseti. Ég þakka hv. þm. Nönnu Margréti Gunnlaugsdóttur kærlega fyrir andsvarið og frábæra spurningu af því að þetta er nefnilega kjarni málsins, réttindi fólksins. Bara nákvæmlega eins og hún kom inn á í dag í hennar ræðu þá er það auðvitað mikilvægt að kerfið sé hér til að þjóna fólkinu og fólk þarf að geta treyst því að lög séu skýr og að lög sem Alþingi setur gildi hér á Íslandi. Varðandi vangaveltuna um það hvort ég óttist það hvað gildi þegar lögin stangast á þá kemur einmitt hv. þingmaður inn á þann punkt að ef Alþingi telur að lög eigi að virka á einn eða annan hátt þá þarf það að koma fram hér við setningu laganna. Það er mjög mikilvægt að ef það er einhver blæbrigðamunur í gildi í lögum eða við viljum halda einhverri ákveðinni sérstöðu þá þarf það að koma fram sem vilji þingsins, löggjafarvaldsins. Þess vegna óttast ég ekki áhrifin af því ef það er eitthvert ósamræmi þarna. Þá þurfum við að innleiða annars vegar gerðir EES með réttum hætti eða þá að tilgreina með sérstökum hætti að við ætlum að fylgja lögunum á einhvern annan afmarkaðan hátt. Þetta þarf að vera skýrt, það er alveg þannig.