Evrópska efnahagssvæðið Herra forseti. Það eru ekki alltaf einhliða betri eða meiri réttindi sem fylgja EES-samningnum. Það er ekki útséð með að svo sé. En mig langaði að einbeita mér hér í seinna andsvari að því sem hv. þm. Guðlaugur Þór Þórðarson kom aðeins inn á áðan, þ.e. umræðunni um EES-samninginn hjá hæstv. ríkisstjórn og forystumönnum hennar og mörgum hv. þingmönnum í sumar þegar þeir gerðu allt sem í þeirra valdi stóð til að tala niður EES-samninginn. Það var iðulega minnst á það að við hefðum ekkert um hann að segja. Svo brýtur Evrópusambandið á okkur og ríkisstjórnin virðist bara hafa lagst flöt fyrir því. Einhverjir tóku til varna en aðalatriðið var að reyna að koma Evrópusambandsumsókninni í gang aftur. Ég spyr því aftur: Ef trú ykkar er svona lítil á EES-samningnum, af hverju þorið þið þá ekki að berjast fyrir honum til að auka trúna á samninginn?