Evrópska efnahagssvæðið Herra forseti. Ég var búinn að ákveða hvað ég hygðist spyrja hv. þingmann út í en svo hlustaði ég á orðaskipti hv. þingmanns við hv. þingmann Guðlaug Þór Þórðarson, hvar talið barst að brotum Evrópusambandsins gagnvart Íslandi sem EES-þjóð, hvar hv. þingmaður fullyrti að tekið hefði verið til fullra varna. Þá er eðlilegt að spyrja: Hver var árangurinn af því varnarspili? Ég get reyndar svarað því fyrir hv. þingmann. Hann var enginn. Þannig að það er ekkert sem segir okkur að það hafi verið tekið til fullra varna annað en niðurstaða málsins sem var núll. Ég kem úr þessu samfélagi sem átti allt undir og við létum að sjálfsögðu það fólk sem fór í forystu fyrir Ísland ekki í friði hvað varðar að halda áfram þessari baráttu. Ég verð að segja að okkur fannst ekki lögð sú áhersla á þetta mál sem hefði átt að gera. En kannski leitar klárinn áfram þangað sem hann er kvaldastur. Það kom hér fram í dag í máli hæstv. ráðherra að niðurstaðan hefði verið ásættanleg. Ásættanleg? Algjört tap. Við fengum ekkert út úr þessu. Niðurstaðan var að mati ráðherra ásættanleg. Næsta spurning hlýtur að vera til hv. þm. Kristjáns Þórðar Snæbjarnarsonar, hvort það sé einnig hans mat að niðurstaðan úr þessum mikla varnarslag sem hv. þingmaður lýsir hér hafi verið ásættanleg. Hin spurningin gæti kannski eðlilega verið: Ef þetta er ásættanlegur árangur, og við horfum kannski fram á að þurfa að verja okkur í þessu máli sem hér er til umræðu fyrir dómstólnum, hvers vegna ættum við að treysta þessari sömu sveit til að taka þann varnarslag?