Evrópska efnahagssvæðið Virðulegur forseti. Ég vil þakka hv. þm. Þorgrími Sigmundssyni fyrir hans andsvar. Það er auðvitað þannig, eins og við ræddum hérna áðan, aðrir þingmenn, með stöðuna og hvernig við tryggjum sem best virkni samnings og samstarfs við þjóðir í okkar viðskiptasambandi. Við verðum auðvitað að fylgja þeim leikreglum sem eru í gangi. Réttindi og skyldur, þetta skiptir gríðarlega miklu máli, og aðgangur okkar að þessum markaði skiptir samfélagið gríðarlega miklu máli. Ég tel að það væri hægt að gera jafnvel meira og jafnvel betur í mörgum þáttum af því að ég held að samstarf okkar á Evrópugrundu sé okkur mikilvægt og veiti fyrirtækjum og samfélaginu öllu gríðarlega mikilvægan aðgang að þessu. Varðandi stöðuna og þá varnarbaráttu sem við stóðum frammi fyrir þá er það auðvitað alltaf þannig að þú vilt meira þegar þú ert í samningaviðræðum eða að verja þína hagsmuni. Auðvitað viltu alltaf meira og auðvitað hefði maður ekki viljað að við hefðum endað í þessari stöðu en verja þó stöðuna sem uppi var. Ég minnist þess að m.a. það fyrirtæki sem starfar undir þessu tók þó jákvætt í þá niðurstöðu sem var í málinu og tel ég að það skipti sköpum hvað þetta varðar. En það er okkar að standa vörð um samninginn. Það er okkar að standa við okkar skuldbindingar í þessu og tryggja stöðu okkar. Með þessu máli erum við að tryggja virkni EES-samningsins og í þessu máli erum við að standa við það sem við þurfum að gera.