Evrópska efnahagssvæðið Herra forseti. Ég þakka hv. þm. Jens Garðari Helgasyni fyrir prýðisgott andsvar. Ég held að það sé vel til fundið og ég hef heyrt fleiri hér í dag kalla þetta mál reyksprengju. Þetta er náttúrlega reyksprengja og ætti náttúrlega ekki að vera til umræðu í þinginu núna. Varðandi málatilbúnað ESA gagnvart Íslandi, samningsbrotamálið, var spurningin ekki eitthvað á þessa leið, hvort við ættum ekki að leggja málið til hliðar og taka til varna? Algjörlega, það er nákvæmlega það sem ég endaði innlegg mitt hérna áðan á. Mér finnst frekar undarlegt að vera að ræða það. Ég skil heldur ekki af hverju er verið að henda þessu inn í þingið núna strax í kjölfar þessarar þjóðaratkvæðagreiðslu sem haldin var 29. ágúst þar sem var afgerandi niðurstaða íslensku þjóðarinnar. Það var ekkert naumt á munum. Ég skil ekki af hverju það er verið að koma með þetta núna inn í þingið þegar, eins og ég heyrði hérna í umræðunni í dag, menn vissu að það væri á leiðinni samningsbrotamál frá ESA. Af hverju var ekki greint frá því fyrir þjóðaratkvæðagreiðsluna t.d.? Ég ætla að giska á af hverju það var ekki gert. Ég held að það hafi ekki verið gert vegna þess að þá hefði verið alveg klárt að þau hefðu getað kastað inn handklæðinu og þjóðaratkvæðagreiðslan hefði tapast með miklu stærri hætti fyrir þau. Það held ég. Þannig að ég segi: Við eigum að taka til sterkra varna. Við eigum að skipa öflugasta málsvarnarteymi sem við getum fundið. Við eigum að leggja þetta frumvarp til hliðar meðan málið verður leitt til lykta. Og eitt enn: Stjórnarskráin verður alltaf að njóta vafans. Ég meina, það er tekist hér á og það eru ekki bara við hérna í þessum sal, það er tekist á um það. Ég er ekki löglærð en löglærðir aðilar, hæstaréttardómarar og lögfræðingar úti í bæ, eru ekki sammála um hvort stjórnarskráin heimili þetta valdframsal.