Evrópska efnahagssvæðið Herra forseti. Ég þakka hv. þm. Jens Garðari Helgasyni fyrir seinna andsvarið. Hann talar um hvort þetta sé jójó-mál, hvort ríkisstjórnin sé ekki bara að henda þessu inn í þingið til að beina athyglinni annað, beina athygli fólks frá atvinnu- og efnahagsástandinu í landinu, beina athyglinni frá því t.d. að nú er ekki bjart fram undan varðandi kjarasamningana. Ég hef reyndar ekki séð fréttir alveg síðasta klukkutímann. Það bendir margt til að þeim verði sagt upp og það er ekki góðs viti, held ég, að ríkisstjórnin klári þetta mál. Ég vildi óska þess. Ég vil bara svara þessu þannig. Ég vildi óska þess að hæstv. utanríkisráðherra myndi leggja þetta mál til hliðar og við fengjum úr því skorið, við færum í þetta dómsmál og færum í þetta samningsbrotamál og fengjum líka úr því skorið af því að það er tekist á um stjórnarskrárþáttinn. Ég tel að stjórnarskráin heimili ekki þetta valdframsal. Aðrir eru annarrar skoðunar. Er hægt að skera úr um það? Ég tel að það sé mikilvægt. Þetta er risastórt mál og ef ég á að svara því hvort ég telji að ríkisstjórnin geti komið þessu í gegnum þingið held ég að það sé markmiðið. Ég held að það sé raunverulega markmiðið núna. Þau töpuðu þjóðaratkvæðagreiðslunni um áframhaldandi aðlögunarviðræður við Evrópusambandið. Ég held að þetta eigi að keyra í gegn, því miður.