Evrópska efnahagssvæðið Herra forseti. Ég þakka hv. þingmanni fyrir andsvarið. Svo ég reyni að svara spurningunni fyrst þá finnst mér það ekkert endilega skrýtið og ekki heldur mjög skrýtið. Það er þannig að þótt ég minnist þess ekki sérstaklega sat ég örugglega þennan fund þegar Árni Páll Árnason tilkynnti þetta. Ég er í nefnd sem heitir EFTA-EES-nefnd og ESA fundar með okkur reglulega og kemur þá hingað til landsins. Þetta mál hefur jafnan verið til umræðu og þó að ég hafi viðurkennt hér áðan að ég muni þetta ekki sérstaklega þá efast ég ekkert um að Árni Páll fari með rétt mál. Þá get ég velt því upp af hverju þetta hefur kannski ekki verið minnisstætt og staðreyndin er sú að við erum búin að eiga þetta mál yfir höfði okkar núna árum saman og jafnvel í upp undir tvo áratugi. Ég held að það hafi ekki haft svo mikið að segja að þetta væri mál sem yrði vísað til dómstólsins. Ég satt að segja var að vonast, eins og ég sagði í ræðu minni áðan, að ESA hefði ákveðið að bíða og sjá hver niðurstaða þessa máls yrði hér og þá eftir atvikum fara fram með mál ef málið hefði ekki klárast núna. En sennilega má bara vísa í það að þolinmæði þeirra hafi verið þrotin og þeir sem eru í stjórn ESA hafi talið að þeir kæmust ekki lengra með þetta mál.