Evrópska efnahagssvæðið Herra forseti. Ég þakka hv. þm. Grími Grímssyni kærlega fyrir andsvarið þó að ég verði að viðurkenna að ég skildi ekki nákvæmlega hvert hann var að fara, hvort þetta átti sér stað eða ekki, en svo átti það sér stað en samt ekki, svo var þetta líklega þarna einhvers staðar. Ég vona að ráðuneytið hafi verið betur meðvitað um þetta en hv. þingmaður, ekki það að hann ber ekki ábyrgð á þessu. Það gerir ráðherrann hans og flokkurinn, en þetta var alla vega mjög furðulegt. Ég vona að þetta sé í einhverjum betri og fastari skorðum einhvers staðar annars staðar. Mér finnst skrýtið að vita af hættunni þetta lengi. Það er rosalega mikið talað um EES-samninginn núna. Hæstv. ráðherra Þorgerður Katrín Gunnarsdóttir byrjar náttúrlega strax korteri eftir atkvæðagreiðsluna og í raun og veru bara um nóttina, aðfaranótt 30. ágúst, var hún farin að leggja drög að því sem við erum að ræða hér í dag þegar hún áttaði sig á hver úrslitin væru. En mig langaði bara aðeins að velta því upp með hv. þingmanni af hverju honum finnst að eigi — af því að hv. þm. Ingibjörg Davíðsdóttir var einmitt að tala um það hér rétt áðan hversu mikil keppnismanneskja hún er — einhvern veginn að fara að strauja í þessa vegferð núna með bókun 35 þegar það hefði auðvitað verið hægt að gera síðasta vor. Er EES-talið hjá Viðreisn bara tóm tunna? Er Viðreisn EES-flokkur eða ESB-flokkur? Það er ekki hægt að velja á milli eftir því sem hentar. Annaðhvort ertu á ESB-vegferðinni eða þú ætlar að virða EES-samninginn. Þannig að ég vil fá einhver aðeins skýrari svör frá hv. þingmanni.