Evrópska efnahagssvæðið Frú forseti. Ég þakka hv. þm. Guðlaugi Þór Þórðarsyni kærlega fyrir virkilega góða ræðu. Hún var á köflum eiginlega eins og lygasaga því þetta mál um umsókn um aðild að Evrópusambandinu hjá þessari ríkisstjórn er að verða einhvers konar farsi. En í ljósi þess að hv. þingmaður var einu sinni hæstv. utanríkisráðherra þá langar mig að spyrja hvort hann geti ímyndað sér af hverju þessi ríkisstjórn eða hæstv. ráðherrar vilji ekki svara því hvort þeir líti svo á að Ísland sé umsóknarríki um aðild að Evrópusambandinu. Af hverju vilja þau ekki svara þeirri spurningu? Hver getur verið ástæðan? Það er augljóst að þau vilja halda í að umsóknin sé einhvern veginn virk. Af hverju vilja þau halda í það? Þau eru búin að lofa að ætla ekki að fara í þessar aðildarviðræður á þessu kjörtímabili. Telja þau að það verði auðveldara að gera eftir næstu kosningar ef þau komast til valda eða hver er skýringin á þessu? Og varðandi málefni fyrrverandi hæstv. utanríkisráðherra, Gunnars Braga Sveinssonar, sem er með ólíkindum líka, þá langar mig líka að spyrja: Hvað er verið að fela? Nú veit ég að þegar hv. þm. Guðlaugur Þór Þórðarson var hæstv. utanríkisráðherra þá barðist hann fyrir vörnum Íslands í þessu máli. Hann hélt uppi vörnum og því langar mig að spyrja út í þetta mál: Af hverju? Hver eru sinnaskiptin? Af hverju halda þessir ráðherrar ekki uppi vörnum fyrir Ísland þegar liggur fyrir að það var gert hér áður fyrr?