umræða um breytingu á húsaleigulögum Virðulegur forseti. Mig langar bara aðeins að koma upp og blanda mér í þessa umræðu sem mér finnst vera orðin mjög áhugaverð, sérstaklega eftir innkomu hæstv. ráðherra Ragnars Þórs Ingólfssonar og hans ræðu hér sem ég held að við þurfum bara aðeins að kryfja og fara betur yfir hér eftir þennan lið og hlusta á hvað hæstv. ráðherra var raunverulega að segja. Það er náttúrlega með ólíkindum að koma hér upp og halda því fram hér í þessum ræðustóli Alþingis að stjórnarandstaðan sé á móti öllu sem verið er að gera til að bæta hag og kjör almennings í landinu, ekki einhverju heldur öllu. Þá langar mig bara að benda hæstv. ráðherra á fjárlagafrumvarp hans eigin ríkisstjórnar sem er að fara að leggja gríðarlegar byrðar og álögur á einmitt tekjulægsta fólkið í landinu. Það er t.d. það sem við höfum verið að benda á. Er hlustað á það? Nei, það er ekkert hlustað á það. Er hlustað á seðlabankastjóra? Nei. Að leggja að jöfnu hér að seðlabankastjóri sé með ákvarðanavald varðandi stýrivexti og svo þetta ágæta frumvarp sem við erum hér að ræða er náttúrlega galið, virðulegur forseti.