húsaleigulög Frú forseti. Ég þakka hv. þingmanni fyrir seinni spurninguna og biðst velvirðingar á því að ég gleymdi hluta af fyrri spurningunni sem er mjög áhugaverður. Það varðaði skort á viðveru og þátttöku fulltrúa Viðreisnar í þessari umræðu. Hún er auðvitað bara algjörlega hrópandi. Enda held ég að Viðreisn líði ekki vel með þetta mál frekar en nokkur önnur sem hafa verið hér til meðferðar í þessu þingi frá því að ríkisstjórn Kristrúnar Frostadóttur tók við, enda á allt annarri vegferð en Viðreisn seldi sig út fyrir að fara á þegar við vorum að hlusta á stefnur og strauma í kosningaloforðum í aðdraganda síðustu kosninga. Hér hefur komið upp úr kafinu einhver allt annar flokkur, held ég, en fólk gat almennt áttað sig á að byggi þar innan húss. Þessi frjálslyndi flokkur, sem átti jafnvel að vera með örlitla miðju-hægri slagsíðu og þar fram eftir götunum, hefur reynst vera hinn mesti skattaflokkur og er eiginlega nær því að vera vinstri flokkur í þessari ríkisstjórn en nokkurn tíma miðjuflokkur eða hægri flokkur. Og ekki er það nú til að „ballansera“ af efnahagsstefnu Flokks fólksins. En varðandi hina spurninguna þá þekkjum við orðið þessa aðferðafræði, hv. þingmaður, þ.e. að við lesum bara í fréttamiðlum úti í bæ hvað ríkisstjórnin ætlar að gera og oft og tíðum reyndar bara á til þess sérstaklega auglýstum blaðamannafundum. Svo stendur það ekkert endilega til og jafnvel alls ekki að taka neitt mark á þeim athugasemdum sem berast frá hagaðilum, hvort sem það er úr verkalýðshreyfingunni eða úr atvinnulífinu.